Премиерот Христијан Мицкоски изјави во саботата дека Владата нема да прифати уставни измени или нови отстапки во процесот на европската интеграција сè додека Бугарија не покаже конкретен напредок во исполнувањето на своите обврски и почитувањето на европските стандарди.
Изјавата следува откако бугарската министерка за надворешни работи Велислава Петрова порача дека Скопје треба да бара решенија наместо проблеми и повтори дека Софија нема намера да отстапува од договорената рамка од 2022 година.
„Сè додека сум јас премиер, додека не видиме испорака од бугарска страна, ние нема да се поместиме ниту милиметар“, изјави Мицкоски.
Тој рече дека добрососедските односи мора да се темелат на реципроцитет и меѓусебно почитување, оценувајќи дека Бугарија сè уште не ги спровела пресудите на Европскиот суд за човекови права поврзани со правата на Македонците во земјата.
„Добрососедските односи се двонасочна улица. Не можете да танцувате сами – или танцувате со партнер или немате партнер“, рече премиерот.
Мицкоски изјави дека Македонија континуирано нуди предлози за надминување на спорните прашања, но оти на маса остануваат најмалку 14 пресуди од Судот во Стразбур кои, според него, не се почитуваат од бугарска страна.
„Ако сите се повикуваме на европските вредности, тогаш тие мора да важат за сите подеднакво“, рече тој.
Премиерот оцени дека актуелните односи со Софија се одвиваат во услови кога Бугарија се соочува со внатрешни политички и економски предизвици, вклучително и растечки притисоци врз јавните финансии и инфлацијата.
Според него, евроинтегративниот процес не смее да се претвори во механизам за дополнителни условувања.
„Ако некој мисли дека за да бидеме дел од европското семејство мора безусловно да ги прифатиме сите нивни барања, тогаш оваа Влада нема да ја игра таа игра“, рече Мицкоски.
Македонија останува блокирана во отворањето на следната фаза од пристапните преговори со Европската унија поради условот за внесување на Бугарите во Уставот, предвиден со преговарачката рамка усвоена во 2022 година.
Посетата на претседателот на Европскиот совет Антонио Кошта на Скопје, закажана за 2 јуни, како и самитот ЕУ–Западен Балкан во Тиват на 5 јуни, се очекува дополнително да ги актуелизираат разговорите за иднината на проширувањето и можните модели за постепена интеграција на земјите од регионот.