Израелски официјални лица, повикувајќи се на извори цитирани од Ројтерс и израелски медиуми, тврдат дека иранскиот врховен лидер, Али Хаменеи, е убиен во заеднички американско-израелски напади. Иранските државни медиуми брзо ги отфрлија тврдењата, наведувајќи дека тој е жив.
Нема официјална потврда од Техеран. Полуофицијалните агенции Тасним и Мехр објавија дека Хамнеи е „цврст и истраен во раководењето со теренот“, оценувајќи ги извештаите за неговата смрт како „психолошка војна“.
Тврдењата доаѓаат откако американскиот претседател Доналд Трамп изјави дека САД започнале „големи борбени операции“ против Иран, по претходните израелски ракетни напади. Иранските медиуми, повикувајќи се на Црвената полумесечина, објавија дека најмалку 201 лице загинало во 24 провинции.
Портпаролот на израелската војска изјави во телевизиско обраќање дека се убиени неколку високи ирански функционери и дека биле погодени повеќе цели, вклучително и ракетни лансирни позиции. Тој не прецизираше колку долго ќе траат операциите.
Секретарот на иранскиот Врховен совет за национална безбедност, Али Лариџани, порача дека Техеран ќе возврати. „Храбрите војници и големата нација на Иран ќе им одржат незаборавна лекција“, изјави тој за државната агенција ИРНА.
Контрадикторни информации
Ројтерс и израелски медиуми, повикувајќи се на неименувани високи израелски претставници, објавија дека Хамнеи е убиен. Од Техеран засега нема официјална потврда.
Иранскиот министер за надворешни работи изјави за американски медиум дека „колку што му е познато“, врховниот лидер и другите високи функционери се во добра здравствена состојба.
Од кабинетот на врховниот лидер соопштија дека станува збор за „ментална војна“ од страна на противниците на Иран.
Расте регионалната тензија
Амбасадата на САД во Бахреин соопшти дека има потврдени извештаи за ирански беспилотни летала кои погодиле високи згради во земјата и ги повика американските државјани да избегнуваат одредени области.
Советот за безбедност на Обединетите нации треба да одржи итна седница на барање на Кина и Русија. Се очекува со седницата да претседава генералниот секретар на ОН, Антонио Гутереш. Се очекува учество на Иран и Израел, додека не е јасно дали ќе се приклучат и некои земји од Заливот.
Турција понуди посредување за прекин на огнот, предупредувајќи дека конфликтот може да прерасне во поширока регионална војна со сериозни безбедносни и економски последици.
Трамп: Војната може да трае или брзо да заврши
Во телефонско интервју за американски медиум, Трамп изјави дека конфликтот може „да трае долго“ или да заврши за неколку дена, посочувајќи дека постојат повеќе „излезни стратегии“.
Тој додаде дека Иран ќе има потреба од години за да се опорави од нападите и дека одлуката за воена акција ја донел и покрај тековните нуклеарни разговори.
Ситуацијата останува динамична, а независна потврда за клучните тврдења – вклучително и наводната смрт на Хамнеи – засега нема.