Претседателот на Уставниот суд, Дарко Костадиновски, денеска информира дека за системот за видео-набљудување „Сејф сити“ се формирани четири предмети и дека по нив ќе се постапува брзо, нагласувајќи дека проектот покажува дека македонскиот менталитет може брзо да се приспособи на правила.
„Четири предмети се формирани. Точно е дека ќе се постапува бидејќи е новина во нашата држава. Не можам предвреме да давам анализа, но веќе еднаш го изнесов својот личен став“, рече Костадиновски.
Тој потенцира дека проектот има легитимна цел, е општествено оправдан и дека мерките се пропорционални на целите што се сакаат да се постигнат. „Овој проект ни покажа дека нашиот менталитет може многу брзо да се смени, односно да се прилагодува – на правила“, додаде претседателот на судот.
Костадиновски коментираше и за предлогот за назначување на професорот Гоце Наумовски за нов уставен судија, потенцирајќи дека искуството од академијата е добредојдено за уставното судство. Тој истакна дека фактот што Наумовски бил советник на премиерот не го дисквалификува, додавајќи дека и самиот бил советник на тројца македонски претседатели.
„Извршувањето на должноста е дел од карактерот и кредибилитетот на човекот. Нашата работа се цени во оваа сала. Јас сум лојален на Уставот и тоа го очекувам и од новите и од досегашните судии“, рече Костадиновски.
Претседателот на Уставниот суд ја коментираше и примената на Бадентеровиот принцип, посочувајќи дека тој е значаен за политички органи како Собранието, но дека не треба да се применува во Уставниот суд бидејќи би го компромитирал правното расудување за уставноста и законитоста.
За Законот за употребата на јазиците, Костадиновски изјави дека заклучокот за одржување подготвителна седница е се уште во сила и ќе се отвори на првиот работен состанок на судот.
Тој апелираше граѓаните да не наседнуваат на политички манипулации и потенцираше дека одлуките на Уставниот суд не се „страшила“, туку резултат на законско и уставно постапување.
Костадиновски посочи дека предметите за линеарно зголемување на пензиите, јавноста во судството, Законот за потрошувачи, нерезидентните и глобалниот данок се од повисок општествен интерес.