Во документи објавени од американското Министерство за правда се наведуваат тврдења на починатиот финансиски посредник Џефри Епстин дека коосновачот на „Мајкрософт“, Бил Гејтс, добил сексуално пренослива болест по контакти со, како што се наведува, „руски девојки“.
Во е-пошта од 2013 година, Епстин тврди дека Гејтс побарал антибиотици кои наводно сакал „тајно да ѝ ги даде“ на тогашната сопруга Мелинда Гејтс, од која подоцна се разведе. Автентичноста на тврдењата не е независно потврдена.
Документите се дел од повеќе од три милиони страници материјали што беа објавени по налог на администрацијата на поранешниот претседател Доналд Трамп. Тие вклучуваат и нови фотографии од Епстин и Гејтс, кој досега не се има јавно огласено за содржината на објавите.
Во друга порака, Епстин му напишал на поранешниот британски министер Питер Менделсон дека имал „огромна забава“ со Гејтс во Сиетл. Менделсон претходно го опишувал Епстин како „добар пријател“, според објавените документи.
Портпарол на Гејтс ги негираше обвинувањата, нарекувајќи ги „апсолутно апсурдни и целосно невистинити“, и додаде дека документите ја покажуваат, како што рече, фрустрацијата на Епстин поради немање континуирана врска со Гејтс.
Епстин, кој почина во затвор во 2019 година додека чекаше судење за трговија со луѓе, продолжува да фрла сенка врз бројни влијателни личности со кои бил поврзуван. Документите повторно ги отворија и прашањата за неговите контакти со британски политичари и членови на кралското семејство.
Американското Министерство за правда соопшти дека објавениот материјал вклучува илјадници видеа и стотици илјади фотографии, и дека објавувањето е дел од законска обврска за целосна транспарентност.