Претседателот на Европскиот совет, Антонио Кошта, претседателката на Европската комисија, Урсула фон дер Лајен, и претседателката на Европскиот парламент, Роберта Мецола, во вторникот изјавија дека Европската унија ќе продолжи со сеопфатната поддршка за Украина и ќе го зголеми притисокот врз Русија, на четвртата годишнина од почетокот на целосната руска инвазија.
Во заедничка изјава, тројцата европски лидери им оддадоа почит на „храбрите луѓе на Украина“ кои, како што наведоа, и понатаму се спротивставуваат и ја бранат својата земја.
„Русија не ги постигна своите воени цели во Украина“, се наведува во соопштението. Брисел ја обвини Москва дека, поради неможност да напредува на бојното поле, намерно таргетира цивилна и критична инфраструктура, вклучително и енергетски капацитети, болници, училишта и станбени објекти, особено во услови на тешка зима.
ЕУ повтори дека останува цврсто на страната на Украина и дека нејзината цел е „сеопфатен, праведен и траен мир“, заснован врз принципите на Повелбата на Обединетите нации и меѓународното право.
„Почитувањето на суверенитетот и територијалниот интегритет е темел. Ниедна земја не може да го анектира својот сосед. Границите не можат да се менуваат со сила. Агресорот не може да биде награден“, се вели во изјавата, со нагласување на важноста од одржување на трансатлантската и глобалната солидарност со Киев.
Европската унија соопшти дека од 2022 година обезбедила речиси 200 милијарди евра поддршка за Украина и дека европските лидери се договориле да издвојат дополнителни 90 милијарди евра за периодот 2026–2027 година. Од тие средства, 60 милијарди евра ќе бидат наменети за воени потреби во рамки на т.н. „Програма Еже“, со првата исплата најавена „што е можно поскоро“.
Во текот на зимата, ЕУ и земјите членки испорачале, како што се наведува, невидена енергетска помош, системи за противвоздушна одбрана и противдронска заштита, како и хуманитарна помош. Најавен е и нов пакет за итна испорака на генератори и дополнителна хуманитарна поддршка, како и работа на нов план за енергетска безбедност и подготвеност, насочен кон поправка и зајакнување на електроенергетската мрежа и брзо обновување на оштетените капацитети.
ЕУ истакна дека ќе продолжи да врши притисок врз рускиот енергетски и финансиски сектор, вклучително и со дополнителни мерки против таканаречената „сенка флота“.
Во изјавата се наведува и дека Унијата и нејзините земји членки се подготвени да придонесат кон „робустни и кредибилни безбедносни гаранции“ за да се спречи нов руски напад по завршувањето на војната.
Брисел, исто така, вети дека Русија ќе биде повикана на одговорност за сторените злосторства и предизвиканата штета, со заложба за што побрзо оперативно воспоставување на Специјален трибунал за злосторството агресија против Украина и Меѓународна комисија за побарувања за Украина во рамки на Советот на Европа.
Лидерите нагласија дека иднината на „безбедна и просперитетна Украина“ е во Европската унија, посочувајќи дека Киев постигнал значителен напредок во реформите поврзани со пристапувањето, и покрај воените услови.
„Стоиме цврсто со Украина – за праведен и траен мир, за силна и суверена Украина во силна и суверена Европа“, се наведува во заедничката изјава.