Министерот за надворешни работи и надворешна трговија Тимчо Муцунски и претседателката Гордана Сиљановска-Давкова се во работна посета на Обединетите Арапски Емирати, каде ќе учествуваат на Светскиот самит за влади во Дубаи.
Посетата ќе трае од денес до четврток, а фокусот ќе биде ставен на економската соработка, дигитализацијата и можностите за продлабочување на билатералните односи меѓу Северна Македонија и ОАЕ.
Муцунски најави дека во рамки на самитот ќе учествува на панел-дискусии посветени на глобалните економски и логистички предизвици, при што ќе ја истакне улогата на Северна Македонија како стратешка точка на пресекот на Коридорите 8 и 10.
Во рамки на посетата е предвидено и потпишување на меѓувладин меморандум за соработка, насочен кон модернизација и дигитализација на јавната администрација, соопшти министерот.
Муцунски и Сиљановска-Давкова ќе остварат и средби со претставници на македонската заедница во ОАЕ, како и со потенцијални инвеститори, со цел зајакнување на економските и трговските врски.
Светскиот самит за влади во Дубаи собира државни лидери, министри и претставници на меѓународни организации, со фокус на управувањето, иновациите и идните глобални политики.