Повредените млади луѓе од пожарот во дискотеката „Пулс“ во Кочани денеска учествуваа на кошаркарски натпревар, како дел од активностите за одбележување на годишнината од трагедијата. На настанот присуствуваа министерот за здравство Азир Алиу и директорката на Општата болница во Кочани, Катерина Паниќ-Мирчовска.
Министерот Алиу изјави дека ваквите спортски настани се иницирани од самите повредени и дека државата ќе продолжи да ги поддржува во процесот на лекување и рехабилитација.
„Ова е прв спортски настан на кој учествуваат граѓани кои поминале низ тежок и трауматичен период. Особено е охрабрувачки што денес тие повторно се активни и можат да се видат на теренот како спортисти“, рече Алиу.
Тој додаде дека процесот на реевалуација на здравствената состојба на повредените продолжува и дека некои од пациентите ќе бидат упатени во странски клинички центри за третмани кои не се достапни во домашниот здравствен систем. За оние кои ќе продолжат со лекување во земјата, веќе е подготвен протокол за згрижување и рехабилитација.
Директорката Паниќ-Мирчовска истакна дека кошаркарскиот натпревар им овозможува на младите да покажат напредок во рехабилитацијата и дека тимските спортови придонесуваат за соработка и емоционално закрепнување. Таа појасни дека реевалуацијата на здравствената состојба се спроведува на секои шест до седум месеци и вклучува специјалисти од различни области, вклучувајќи дерматолози, пулмолози и хирурзи.
Некои од повредените веќе започнале и со хируршки интервенции за лузни, со што се применуваат најсовремени медицински пристапи. Еден од учесниците, Драган Давитковски, истакна дека кошаркарскиот натпревар има и хуманитарна цел – собирање средства за изградба на споменик посветен на жртвите од пожарот.