Премиерот Христијан Мицкоски најави дека во мај или јуни би можело да се разговара за реконструкција на Владата, поради незадоволство од работата на дел од функционерите.
Во интервју за телевизијата Алфа, Мицкоски изјави дека има „дилеми“ дали одредени владини претставници и службеници го даваат својот максимум или се однесуваат несоодветно.
„Кај поединци имам задршка и ги опоменувам, бидејќи сметам дека можат повеќе да дадат,“ рече тој, додавајќи дека „нема простор за импровизации“ и дека институциите мора да испорачуваат резултати.
Премиерот не прецизираше дали незадоволството се однесува на кадри од неговата партија или од коалициските партнери.
Тој потврди дека веќе се водат разговори со коалициските партнери за можни кадровски промени.
„Очекувам во мај-јуни да седнеме и отворено да разговараме за сите теми,“ изјави Мицкоски.
Според него, анализите ќе опфатат кои функционери не ги исполниле очекувањата и каде се потребни промени или ротации.
Мицкоски рече дека владата е фокусирана на исполнување на ветувањата и дека функционерите мора да покажат поголема посветеност во работата.