Азиските берзи паднаа трет последователен ден во средата, додека цените на нафтата пораснаа поради војната меѓу САД и Израел со Иран и нејзиното влијание врз глобалното снабдување со енергија.
Референтниот јужнокорејски индекс Коспи затвори со пад од 12%, откако тргувањето беше привремено запрено поради активирање на механизмот за автоматска заштита од нагли падови, познат како „circuit breaker“. Слични мерки беа активирани и на берзата во Тајланд, откако индексите потонаа за повеќе од 8%.
Јапонскиот индекс Nikkei 225 изгуби 3,6%, додека хонгконшкиот Hang Seng беше понизок за 2,5% во попладневното тргување. Композитниот индекс во Шангај падна за 0,8%.
Цената на северноморската нафта „брент“ порасна за околу 2,8% во попладневната трговија во Азија, продолжувајќи го растот од изминатите два дена, откако конфликтот на Блискиот Исток ги вознемири финансиските пазари и ги турна глобалните енергетски цени нагоре.
Околу една петтина од светската нафта и гас вообичаено минуваат низ теснецот Хормуз, помеѓу Иран и Обединетите Арапски Емирати, но бродскиот сообраќај речиси целосно запре по заканите од Техеран дека ќе „ги запали“ бродовите.
Американскиот претседател Доналд Трамп во вторникот изјави дека американската морнарица ќе ги штити бродовите во регионот „доколку е потребно“, со цел да се спречи енергетски шок предизвикан од војната. Тој додаде дека Вашингтон ќе обезбеди осигурување од ризик „по многу разумна цена“ за бродските компании за да се обезбеди непречен проток на енергија.
Берзите бележат остри загуби откако САД и Израел извршија напади врз Иран за време на викендот. Азиските пазари се особено погодени, бидејќи регионот увезува значителни количини енергија од Блискиот Исток, која мора да мине низ теснецот Хормуз.
Земјите зависни од извоз, како Јужна Кореја и Јапонија, се сметаат за особено ранливи на геополитички шокови што го загрозуваат глобалниот транспорт и трговија.
Коспи го забележа еден од најлошите денови во последните децении. Тргувањето беше прекинато на 20 минути во текот на утрото, како дел од итниот механизам за ограничување на паничното распродавање – првпат од август 2024 година.
Според Џек Ли од истражувачката организација China Macro Group, падот на Коспи ја одразува „кревкоста“ на пазарното расположение под влијание на конфликтот.
За разлика од другите азиски економии, Кина засега бележи релативно ограничено влијание, делумно поради алтернативните извори на енергија, вклучително и увоз на нафта од Русија, рече Ли.
Сепак, со оглед дека конфликтот влегува во петтиот ден, инвеститорите се загрижени дека би можел да прерасне во подолготрајна војна со пошироки последици врз глобалната трговија и економскиот раст.
И европските пазари бележат пад. Британскиот индекс FTSE 100 затвори со минус од 2,75%, додека главните индекси во Германија и Франција загубија повеќе од 3,4%.
На Волстрит, индексот S&P 500 отвори со остар пад, но делумно ги намали загубите и го заврши денот со пад од речиси 1%.