Политичкиот трилер „One Battle After Another“ на режисерот Пол Томас Андерсон освои шест награди на 98-то доделување на Оскарите, вклучително и за најдобар филм и најдобра режија, надминувајќи го вампирскиот трилер „Sinners“, кој освои четири статуетки.
Филмот беше номиниран во 13 категории и доминираше на церемонијата одржана во неделата во Лос Анџелес. Андерсон ја освои и наградата за најдобро адаптирано сценарио за филмот инспириран од романот „Vineland“ на Томас Пинчон.
Во конкуренцијата за најдобар филм, „One Battle After Another“ се натпреваруваше со „Sinners“, режиран од Рајан Куглер, кој исто така беше меѓу фаворитите со вкупно 16 номинации.
„Sinners“ сепак освои значајни награди, вклучително и за најдобар актер, која му припадна на Мајкл Б. Џордан. Наградата ја освои по тесна трка со Тимоти Шаламе, номиниран за улогата во драмата „Marty Supreme“.
Филмот на Куглер освои и награда за најдобро оригинално сценарио.
Една од историските победи на вечерта беше во категоријата за најдобра кинематографија, каде што Отам Дуралд Аркапо стана првата жена што ја освои оваа награда.
Церемонијата донесе и редок преседан: за првпат по седми пат во историјата на Оскарите имаше изедначување во категоријата за најдобар краток игран филм. Наградата ја поделија „Two People Exchanging Saliva“ и „The Singers“.
Меѓу другите победници, анимираниот филм „KPop Demon Hunters“ освои награди за најдобар анимиран филм и најдобра оригинална песна, додека филмот „Frankenstein“ на Гиљермо дел Торо освои три технички награди, меѓу кои за сценографија, костими и шминка.
Неколку филмови со високи очекувања останаа без значајни награди. Драмата „Marty Supreme“, и покрај девет номинации, не освои ниту една статуетка, додека бразилскиот филм „The Secret Agent“, кој претходно триумфираше на Канскиот филмски фестивал, исто така не доби награда.
Церемонијата беше одбележана и со политички и општествени пораки. Неколку говори се осврнаа на растечката улога на вештачката интелигенција во филмската индустрија и на глобалните политички тензии, додека дел од учесниците индиректно ги критикуваа политиките на американскиот претседател Доналд Трамп.
Водителот на церемонијата, комичарот Конан О’Брајан, во воведниот монолог се пошегува со актуелната политичка ситуација во САД, а повеќе добитници на награди повикаа на мир и меѓународна соработка.
Оскарите се одржуваат околу седум месеци пред конгресните избори во САД, но повеќето учесници избегнаа директни политички изјави, нагласувајќи ја улогата на филмот како средство што ги надминува националните и политичките граници.