Животниот век на пациентите со рак во Северна Македонија се продолжува благодарение на новите терапии и зголемените инвестиции во лекување, изјави директорот на Фондот за здравствено осигурување, Сашо Клековски.
Тој рече дека зголемениот буџет за онкологија и воведувањето на иновативни лекови придонеле за подобри резултати кај пациентите, особено кај рак на дојка, белите дробови и меланом.
Буџетот за онкологија во 2026 година изнесува околу 57 милиони евра, што, според надлежните, овозможува поширок пристап до современи терапии.
Податоците покажуваат и раст на бројот на пациенти, при што случаите со меланом во последните пет години се зголемиле за повеќе од 100%, додека ракот на дојка бележи раст од околу 40%.
Од Клиниката за радиотерапија и онкологија велат дека зголемениот број дијагностицирани случаи се должи и на подобрената дијагностика, како и на поголемата достапност на терапија.
Истовремено, надлежните признаваат дека има предизвици во снабдувањето со одредени лекови. Недостигот на терапијата палбоциклиб, која се користи кај рак на дојка, се поврзува со нагло зголемената побарувачка, но од Фондот најавуваат дека проблемот ќе биде решен во наредните недели.
Здравствените власти додаваат дека државата вложува околу 2.500 евра по пациент за онколошки третман, додека плановите се насочени кон понатамошно унапредување на терапиите и подобрување на исходите кај пациентите.