Владата на Албанија усвои нормативен акт за намалување на акцизата за 20% за нафтата и бензинот, со цел да ги ублажи последиците од растот на цените на горивата предизвикан од конфликтот во Иран и нестабилноста на меѓународните пазари.
Министерот за финансии Петрит Малај изјави дека мерката ќе се применува доколку малопродажната цена, утврдена од Одборот за транспарентност, надмине 220 леки за литар за нафта и 200 леки за литар за бензин.
Според владата, мерките ќе останат во сила сè до стабилизирање на глобалната ситуација, со цел да се заштитат граѓаните, буџетот и националната економија.
„Целосно сме ангажирани да одговориме одговорно на секој предизвик, штитејќи ги граѓаните од финансиските ефекти од овој конфликт, како и буџетот и економијата на земјата, особено во ваков критичен момент“, изјави Малај.
Одлуката доаѓа во време на зголемени геополитички тензии и ценовни флуктуации на енергентите, кои имаат директно влијание врз економиите во регионот.