Министерот за внатрешни работи Панче Тошковски изјави дека се води сериозна истрага за случај на врсничко насилство во скопската општина Ѓорче Петров, при што 14 лица се повикани на разговор.
„Се води истрага. 14 лица се повикани на разговор, и за дел од нив ќе следат процесни дејствија“, рече Тошковски, додавајќи дека во предметот е вклучено и Јавното обвинителство.
Тој нагласи дека станува збор за малолетни лица, поради што институциите ќе изнесуваат ограничени информации во јавноста.
„Мораме да одиме со редуцирани информации имајќи предвид дека станува збор за малолетници“, додаде министерот.
Тошковски оцени дека врсничкото насилство претставува сериозен безбедносен и општествен предизвик, нагласувајќи дека институциите мора да бидат фокусирани на негово спречување.
Повеќе детали, како што најави, ќе бидат соопштени во текот на истрагата.