Осомничениот за обидот за напад за време на вечерата на Асоцијацијата на дописници од Белата куќа оставил писмен „манифест“ во кој јасно навел дека сакал да таргетира претставници на администрацијата на претседателот Доналд Трамп, соопшти висок американски функционер.
Претседателот Трамп и првата дама Меланија Трамп биле безбедно евакуирани од настанот, а никој од присутните не бил сериозно повреден, соопштија властите. Еден агент на Тајната служба бил погоден, но заштитен со панцир и не е во животна опасност .
Осомничениот, 31-годишниот Кол Томас Ален од Калифорнија, е уапсен на местото на настанот и обвинет за обид за атентат врз претседателот, како и за повеќе кривични дела поврзани со оружје.
Според истрагата, биле испукани најмалку пет до осум куршуми додека напаѓачот се обидувал да помине безбедносен пункт во хотелот каде се одржувал настанот. Тој бил вооружен со пушка, пиштол и повеќе ножеви.
Видео надзор покажува дека осомничениот се движел низ хотелот со оружје, користејќи внатрешни скали за да ги избегне обезбедуваните зони, пред да биде совладан од службениците на Тајната служба непосредно пред влезот во салата.
Истражителите пронашле анти-Трамп и антихристијанска реторика на неговите профили на социјалните мрежи, додека членовите на неговото семејство претходно ја известиле полицијата за негови пишани пораки.
Властите засега веруваат дека станува збор за „осамен напаѓач“, додека Федералното биро за истраги и Тајната служба продолжуваат со анализата на неговите електронски уреди и мотивите зад нападот.
Ален, кој имал диплома по машинско инженерство и магистратура по компјутерски науки, работел како наставник со скратено работно време и бил опишан како „мирен и учтив“ од луѓе кои го познавале.