Пет министри за финансии од земјите на Европската унија побараа воведување данок на т.н. „неочекуван профит“ на енергетските компании, со цел да се ублажат последиците од растечките цени на енергенсите.
Иницијативата доаѓа како одговор на зголемените трошоци за енергија, поврзани со геополитичките тензии и војната во Иран, кои го притискаат буџетот на домаќинствата и економиите во Европа.
Според предлогот, дополнителните приходи што ги остваруваат енергетските компании во услови на криза би биле оданочени, а средствата би се користеле за поддршка на граѓаните и бизнисите погодени од високите цени.
Министрите од Германија, Италија, Шпанија, Португалија и Австрија во заедничко писмо до Европската комисија наведуваат дека компаниите треба да придонесат во справувањето со товарот од кризата, особено кога остваруваат значителни профити поради пазарните нарушувања.
Предлогот е дел од пошироките напори на ЕУ да ја стабилизира енергетската ситуација, во услови на неизвесност на глобалните пазари и ризик од продолжен недостиг на горива.
Европската комисија засега не соопшти дали ќе ја прифати иницијативата, но веќе разгледува дополнителни мерки за ублажување на енергетската криза.