Американскиот државен секретар Марко Рубио изјави дека САД можат да ја „видат целта“ на војната со Иран, која влезе во петтата недела, додавајќи дека по конфликтот ќе треба да се преиспитаат односите со НАТО.
„Ја гледаме целта. Не е денес, не е утре, но доаѓа“, изјави Рубио за телевизијата Fox News.
Војната започна на 28 февруари кога САД и Израел извршија напади врз Иран, по што Техеран возврати со напади врз Израел и држави од Заливот каде има американски бази.
Заедничките напади на САД и Израел врз Иран, како и израелските напади во Либан, однесоа илјадници животи и раселија милиони луѓе, додека конфликтот ги зголеми цените на нафтата и ги потресе глобалните пазари.
Рубио изјави дека меѓу САД и Иран се разменуваат пораки и дека постои можност за директна средба.
„Се разменуваат пораки, има разговори. Постои можност за директна средба во одреден момент“, рече Рубио.
Американскиот претседател Доналд Трамп изјави дека САД би можеле да ги прекинат воените операции против Иран во рок од две до три недели.
Рубио додаде дека ниедна земја во моментов не презема чекори што би ја попречиле американската мисија.
Исто така посочи дека по завршувањето на конфликтот Вашингтон ќе треба да ги преиспита односите со НАТО, алудирајќи на незадоволството од одбивањето на некои европски сојузници да обезбедат бази и прелети за воените операции.
Европските лидери досега одбиваат директно да се вклучат во воените напади врз Иран.