Армијата на Северна Македонија ќе ја одржи најголемата воена вежба годинава, „Блесок 26“, со цел да ја тестира борбената подготвеност на Лесната пешадиска баталјонска група според НАТО-стандардите.
Вежбата ќе се одржи од 19 до 27 април на армискиот полигон Криволак, како и во касарните „Јане Сандански“ во Штип, „Мирче Ацев“ во Прилеп и „Страшо Пинџур“ во Петровец, и ќе опфати околу 1.500 припадници на армијата.
Началникот на Генералштабот, Сашо Лафчиски, изјави дека станува збор за клучна активност за оценување на најважниот НАТО-деклариран капацитет на земјата.
„Очекуваме по оваа вежба баталјонската група да стане ‘mission capable’, односно способна за мисија и за извршување широк спектар на операции предводени од НАТО,“ рече Лафчиски.
Тој додаде дека ова ќе биде првпат единицата да добие таков статус, што ќе ѝ овозможи да биде ставена на располагање на Здружената команда на НАТО.
Вежбата ќе вклучува боеви гаѓања и сценарија со симулирани инциденти, со цел да се тестираат командувањето, координацијата, логистиката и оперативната подготвеност на единицата.
Директорот на вежбата, Игор Арсовски, изјави дека ќе бидат симулирани 25 настани и ќе се применат 799 критериуми за оценување, во согласност со НАТО процедурите.
Во рамки на активностите ќе се користат оклопни возила, транспортен хеликоптер Ми-8/17, артилериски системи, минофрлачи и беспилотни летала.
Северна Македонија, која стана членка на НАТО во 2020 година, континуирано ги унапредува своите воени капацитети со цел поголема интеграција и учество во сојузнички операции.