Алијансата за Албанците на Зијадин Села оцени дека 27 април 2017 година бил „пресвртна точка за демократијата“ во Северна Македонија, ден кога, како што велат од партијата, паднал „антиалбански режим“ и била отворена нова политичка етапа во земјата.
Од партијата наведуваат дека по настаните од 27 април бил избран првиот Албанец за претседател на Собранието, бил донесен Законот за употреба на јазиците и земјата станала членка на НАТО.
„Тоа беше ден кога политичарите покажаа на дело кој до крај стои зад зборот даден пред народот, а кој го користи зборот за да го манипулира народот“, соопштија од АШ на Села.
Од партијата оценуваат дека денес, девет години подоцна, повторно се отвора дебата околу карактерот на насилствата во Собранието и улогата на тогашните актери.
„Прашањето што треба да се постави не е дали организаторите и извршителите на 27 април нешто бранеле, туку која била улогата на денешниот премиер на Северна Македонија“, велат од партијата.
АзА на Села потсетува на нападот врз Зијадин Села во Собранието, оценувајќи дека фотографиите од тој ден покажуваат дека станувало збор за „убијци, а не бранители“.
Пратеничката Илире Даути, исто така од Алијансата за Албанците, порача дека 27 април е „живо сведоштво“ за тоа, како што рече, „колку жестоко се напаѓа оној што одбива компромис за нацијата“.
„На страната на историјата не те поставува случајноста, туку храброста“, напиша Даути.
Изјавите доаѓаат во период кога случајот „27 април“ повторно е во фокусот на јавноста, по нови тврдења за монтирана постапка, притисоци врз сведоци и политички реакции околу пресудите за упадот во Собранието.