Премиерот Христијан Мицкоски изјави дека со формирањето на Комитетот за јавни инвестиции државата воспоставува „поцврст и поодговорен механизам“ за одлучување за капиталните проекти.
Обраќајќи се пред новоформираното тело, Мицкоски нагласи дека одлуките повеќе нема да се носат врз основа на импровизации, туку врз јасни критериуми, стратегија и визија.
„Времето на стихијно планирање е завршено, доаѓа време на систем и одговорност“, рече премиерот, додавајќи дека јавните инвестиции се клучни за економски раст и отворање работни места.
На состанокот биле разгледани проекти кои веќе добиле позитивно мислење од Министерството за финансии, меѓу кои инфраструктурни инвестиции поврзани со Коридорите 8 и 10, модернизација на железницата, како и проекти во образованието и здравството, вклучително и изградба и унапредување на регионални клинички болници.
Меѓу приоритетите се и инвестиции во дигитализација, како што е владин податочен центар, управување со водни ресурси преку системите Злетовица и Стрежево, како и нови енергетски капацитети и обновливи извори.
Според Мицкоски, Комитетот ќе има клучна улога во утврдувањето на конечната приоритетна листа на јавни инвестиции, оценувајќи дека неговата функција не е формална, туку „вистински филтер за квалитет“.
Владата, како што посочи тој, има за цел да воспостави стратешки пристап кон инвестирањето и да обезбеди рамномерен развој со конкретни резултати за граѓаните.