Пет земји членки на Европската Унија повикаа Европската комисија да воведе поагресивна трговска политика и почесто да отвора истраги за нефер конкуренција и субвенции од странски држави, пренесува „Политико“.
Во заеднички документ подготвен од Франција, Италија, Шпанија, Холандија и Литванија, земјите бараат ЕУ да користи поширок спектар на царини, анти-субвенциски мерки и заштитни механизми за да одговори на глобалните трговски дисбаланси.
Иако во документот директно не се споменува Кина, потписниците предупредуваат дека некои од главните трговски партнери на Унијата создаваат „структурен индустриски вишок“ и воведуваат нови бариери што го нарушуваат пазарот.
Предлогот доаѓа во период кога Европската комисија подготвува нова стратегија за „поасертивна и поефикасна трговска одбрана“ против кинеската конкуренција. Внатрешна дебата за кинеската економска закана во Брисел е закажана за следната недела.
Петте земји предлагаат ЕУ почесто да отвора таканаречени „заштитни истраги“ кога цели индустриски сектори се погодени од евтин увоз. Дополнително, тие бараат Унијата да биде „попроактивна“ пред Светската трговска организација во покренување постапки за прекршување на трговските правила.
Во документот се предлага и воведување нов критериум – „економска безбедност“ – при одлучување дали ќе се активираат трговски санкции. Според потписниците, тоа би помогнало да се заштитат стратешките европски индустрии и синџири на снабдување.
Меѓу идеите е и создавање нов „механизам за отпорност“, кој би се активирал кога постојните трговски инструменти нема да бидат доволни за заштита на европските производители.
Емануел Макрон во петокот повика Европската Унија да се инспирира од американскиот модел на трговска заштита на стратешките индустрии. Францускиот претседател предупреди дека глобалните дисбаланси, вклучително и масовниот извоз од Кина, стануваат централно економско прашање за Европа.