Поранешниот најбогат човек во Молдавија, Влад Плахотњук, е осуден на 19 години затвор поради вмешаност во банкарската измама позната како „кражбата на векот“, соопштија властите.
Судот го прогласи за виновен за учество во шемата од 2014-2015 година, во која беа извлечени околу 1 милијарда долари – сума што во тоа време изнесуваше околу 12% од бруто домашниот производ на земјата.
Плахотњук, кој не присуствуваше на изрекувањето на пресудата, беше обвинет дека лично примил повеќе од 40 милиони долари од измамата. Судот наложи да исплати околу 60 милиони долари отштета на државата. Неговиот адвокат најави жалба, додавајќи дека обвиненијата се неосновани.
Според обвинителството, средствата биле користени за лични цели, вклучително купување приватен авион, недвижности, како и финансирање услуги и инвестиции.
Скандалот избувна во 2014 година, кога за само два дена беа префрлени кредити во вредност од 1 милијарда долари кон компании регистрирани во странство со нејасна сопственост. Владата беше принудена да интервенира за да ги спаси банките, што создаде значителен товар врз јавните финансии.
Истрагите подоцна покажаа дека дел од средствата завршиле во компании поврзани со бизнисменот Илан Шор, кој моментално живее во Москва.
Плахотњук, некогаш влијателна политичка фигура, ја напушти Молдавија во 2019 година откако се соочи со обвиненија за корупција. Тој беше уапсен во 2025 година во Атина и екстрадиран во татковината.
Обвинителите наведоа дека користел влијание во политички, финансиски и криминални кругови за да координира мрежа со цел стекнување незаконска корист.
Плахотњук се соочува и со други судски постапки во Молдавија, но ги негира сите обвиненија, додека неговите адвокати тврдат дека процесите се политички мотивирани.