Разговорите меѓу САД и Иран покажуваат одреден напредок, но двете страни остануваат далеку од конечен договор, додека клучниот Ормуски теснец повторно е затворен, изјавија официјални претставници.
Американскиот претседател Доналд Трамп рече дека се водат „многу добри разговори“ со Техеран, но нагласи дека САД нема да дозволат да бидат „уцени“ преку контролата на стратегискиот поморски премин.
„Иран малку се заигра, како што прави веќе децении,“ изјави Трамп, додавајќи дека американската блокада на иранските пристаништа ќе остане во сила додека не се постигне целосен договор.
Од иранска страна, претседателот на парламентот Мохамад Багер Галибаф потврди дека има напредок во преговорите, но оцени дека двете страни се „далеку од финален договор“.
Ормускиот теснец, низ кој минува значителен дел од светските нафтени испораки, беше кратко време отворен, но повторно затворен од страна на иранската Револуционерна гарда, која соопшти дека блокадата ќе остане сè додека САД не ги укинат ограничувањата кон Иран.
Во меѓувреме, беа пријавени и нови безбедносни инциденти во регионот. Британската агенција за поморска безбедност соопшти за напад врз танкер и товарен брод во близина на Оман, додека Индија информираше дека два нејзини бродови биле вмешани во „инцидент со пукање“ во теснецот.
Конфликтот меѓу САД и Иран ескалираше на 28 февруари по пропаѓањето на дипломатските разговори и воени напади врз Иран. Оттогаш, повеќепати беа најавувани рокови и услови, но без конечен пробив.
И покрај привремениот прекин на огнот договорен со посредство на Пакистан, неизвесноста останува висока, а глобалните пазари внимателно ги следат случувањата околу Ормускиот теснец, кој е клучна артерија за светската енергетска трговија.