Генералниот секретар на НАТО Марк Руте изјави дека Европа мора да стане посилна во рамки на „посилно НАТО“, повикувајќи на зголемени трошоци за одбрана и поголема европска одговорност за безбедноста на континентот.
Руте говореше на самитот на Букурештската деветка (Б9) и нордиските земји во Букурешт, чиј домаќини беа романскиот претседател Никушор Дан и полскиот претседател Карол Навроцки.
„Овој собир на НАТО сојузниците, од Црното Море до Арктикот, го демонстрира нашето единство и решителност да стоиме заедно и да се браниме од секоја закана, од секоја насока“, изјави Руте.
Пред самитот на НАТО во Анкара во јули, генералниот секретар нагласи дека е потребна „посилна Европа во посилно НАТО“, преку поголеми инвестиции во одбраната и зголемено производство на оружје и воена опрема.
„Европските сојузници треба да преземат повеќе одговорност за сопствената конвенционална одбрана, поддржани од американската моќ“, рече Руте.
На состанокот во Букурешт учествуваше и украинскиот претседател Володимир Зеленски, кој разговараше со лидерите за дополнителна помош за Украина во одбраната од руската агресија.
Руте повика на поголема поддршка преку иницијативата PURL, преку која НАТО обезбедува американска воена опрема за Украина, финансирана од сојузниците и партнерските земји.
Самитот Б9 се одржа во услови на зголемени безбедносни тензии во Источна Европа и засилени повици европските членки на НАТО да ги зголемат воените буџети поради руската војна во Украина.