Претседателката Гордана Сиљановска-Давкова повика на зајакната заштита и унапредување на македонскиот јазик, предупредувајќи дека неговото негирање претставува закана за идентитетот, по повод 5 Мај – Денот на македонскиот јазик.
„Денес, повеќе од кога било, наша обврска е да го чуваме, негуваме и унапредуваме македонскиот јазик. Да го чуваме и браниме од негирања, оти без него не сме тие што сме ниту ќе останеме свои“, порача претседателката во честитка до граѓаните.
Таа истакна дека правилната и достоинствена употреба на јазикот, како и доследната примена на Законот за употреба на македонскиот јазик, се клучни за функционирањето на демократската држава.
Според неа, македонскиот јазик претставува темел на националниот идентитет и самобитност, како и сведоштво за историскиот континуитет и културното наследство.
„Тој е огледало на генерации Македонци низ вековите, преку него се изразува народниот дух, а со неговото опстојување се потврдува нашето постоење“, се наведува во пораката.
Претседателката додаде дека јазикот е средство за изразување љубов, идеи и создавање уметнички и научни дела, оценувајќи го како носител на трајни вредности.