Бизнисменот и поранешен градоначалник на Скопје, Трифун Костовски, најави формирање нова политичка партија, повикувајќи ги граѓаните кои, како што рече, сакаат Македонија да опстои како држава, да му се придружат.
Во објава на социјалните мрежи, Костовски порача дека иницијативата не е личен проект, туку повик за создавање политички субјект кој ќе биде ослободен од партиски и лични интереси.
„Ова не е само моја идеја. Ова е повик до сите што чувствуваат дека Македонија заслужува подобро, поправедно и подостоинствено утре. Време е за политички субјект без партиски и лични интереси“, напиша Костовски.
Тој наведе дека новата партија би била отворена за сите полнолетни граѓани, без ограничување на возраста.
„Не барам власт за себе, туку можност за освестување на државно ниво. Македонија да биде пред секоја партија“, порача Костовски, додавајќи дека иницијативата не е повик за поделба, туку за обединување.
Трифун Костовски беше градоначалник на Скопје од 2005 до 2009 година. Во својата политичка кариера беше и пратеник во Собранието, а во јавноста е познат и како долгогодишен бизнисмен.