Руски дрон удри во станбена зграда во источна Романија, предизвикувајќи пожар и повредувајќи две лица, соопштија романските власти, во првиот случај од почетокот на војната во Украина во кој романски граѓани се повредени во инцидент поврзан со руски беспилотни летала.
Инцидентот се случил во градот Галац, во близина на границата со Украина. Според романската служба за вонредни состојби, дронот експлодирал при ударот во станбениот објект, предизвикувајќи пожар на десеттиот кат.
Околу 70 жители биле евакуирани, додека две лица со полесни повреди биле пренесени во болница.
Романското Министерство за одбрана соопшти дека по детектирањето на беспилотните летала биле подигнати два борбени авиони Ф-16. Војската имала само четири минути од откривањето на дронот до моментот на ударот.
Генералот Георге Максим изјави дека романските сили биле ограничени во дејствувањето бидејќи не можеле да отвораат оган кон цели во украинскиот воздушен простор.
„Украина е во војна, но Романија е во мир. Не можеме да испукуваме проектили во украинскиот воздушен простор“, рече тој.
Романското Министерство за надворешни работи го повика рускиот амбасадор на разговор, додека претседателот Никушор Дан свика итна седница на Врховниот совет за одбрана.
Тој го оцени инцидентот како „најсериозен настан што ја погодил романската територија од почетокот на руската агресија врз Украина“.
Како одговор, Романија најави затворање на рускиот конзулат во Констанца и побара забрзано распоредување на дополнителни системи за одбрана од дронови од НАТО.
Генералниот секретар на НАТО Марк Руте изјави дека разговарал со романскиот претседател и нагласил дека Алијансата е подготвена да го брани „секој сантиметар од територијата на сојузниците“.
„Непромисленото однесување на Русија претставува опасност за сите нас“, порача Руте.
Претседателката на Европската комисија Урсула фон дер Лајен оцени дека „руската агресија преминала уште една црвена линија“ и најави натамошен притисок врз Москва.
Украинскиот министер за надворешни работи Андриј Сибиха изјави дека инцидентот уште еднаш покажува дека руската агресија претставува закана за целиот регион на Црното Море и за Европа.
Од почетокот на војната во 2022 година, Романија регистрирала остатоци од руски дронови на својата територија во најмалку 47 случаи, од кои 12 само оваа година. Сепак, ова е првпат удар на руски дрон да предизвика повреди кај романски цивили.
Москва сè уште нема официјален коментар за инцидентот.