Лидерот на СДСМ, Венко Филипче, ги повика политичките партии, граѓанските организации, активистите и граѓаните да се приклучат на новоформираниот „Фронт за слобода и правда“, оценувајќи дека актуелната влада ја води државата во погрешна насока.
Говорејќи на изборниот конгрес на НСДП, Филипче му честиташе на претседателот на партијата, Горан Мисовски, за досегашната работа и се заблагодари за долгогодишната коалициска соработка.
„Коалицијата и соработката продолжуваат и понатаму, сега во нова форма – Фронтот за слобода и правда“, рече Филипче.
Тој изјави дека поканата за приклучување е упатена не само до партиите кои веќе се дел од опозицискиот блок, туку и до други политички субјекти, вклучително и партии кои соработуваат со владејачката коалиција.
Филипче ги повика и граѓанските организации, интелектуалците, студентите, младите и пензионерите да се приклучат на иницијативата, тврдејќи дека земјата нема перспектива со сегашната власт.
Лидерот на СДСМ ја обвини Владата за корупција, економско назадување и меѓународна изолација на државата, како и за, како што рече, застапување на туѓи интереси.
„Македонија повторно ќе биде на вистинскиот пат кон Европа, повторно ќе биде демократска и слободна држава во која младите ќе ја гледаат својата иднина“, рече Филипче.