Албанскиот премиер Еди Рама изјави дека протестите против инвестициите во Звернец и Сазан се злоупотребуваат од групи со политички и странски интереси, повикувајќи ги функционерите на Социјалистичката партија да бидат поактивни на социјалните мрежи и на терен.
Во објава на социјалните мрежи, Рама објави фотографии од учесничка на протестите, за која тврди дека е сестра на иранскиот генерал Касем Сулејмани, убиен во американски напад во 2020 година. Тој наведе дека протестите се инфилтрирани од лица кои, според него, шират омраза и повикуваат на уривање на владата.
„Не занимавајте се со демонстрантите, туку со оние што имаат корист од нив“, напиша Рама, тврдејќи дека зад протестите стојат странски финансиски интереси, домашни политички актери или комбинација од двете.
На состанок со политичките координатори на Социјалистичката партија, Рама ја оцени ситуацијата како „дигитална војна“ и побара пратениците и градоначалниците да бидат поактивни на социјалните мрежи за да се спротивстават, како што рече, на дезинформациите и организираните кампањи против владата.
Тој исто така ги повика пратениците почесто да се среќаваат со граѓаните и редовно да ги одржуваат своите канцеларии отворени за да ги слушнат нивните проблеми.
Албанската влада континуирано ги брани инвестициите во Звернец и Сазан, оценувајќи дека ќе придонесат за економски и туристички развој. Од друга страна, демонстрантите и еколошките организации предупредуваат дека проектите можат да предизвикаат сериозни последици врз заштитените природни подрачја.