Лидерот на ДУИ, Али Ахмети, најави дека во иднина ќе се повлече од претседателската функција во партијата и ќе се приклучи на редовите на партиските ветерани.
Говорејќи на Изборното собрание на ДУИ во Куманово, Ахмети рече дека партијата спровела длабоки кадровски промени, при што се сменети 83 проценти од централното раководство и 73 проценти од раководството на огранокот во Куманово.
„Сите што ја основаа ОНА и ДУИ денес се наредуваат зад 73 проценти млади момчиња и девојки. Нашата мисија отсекогаш била да изградиме нови генерации“, рече Ахмети.
Тој посочи дека поранешните функционери постепено ќе добиваат улога во Комитетот на ветерани, споменувајќи го и поранешниот министер Садула Дураку.
„По тебе доаѓам јас. Нема вечно да останам претседател на партијата. И јас сакам да застанам меѓу ветераните и членовите на ДУИ да видат како се бори еден ветеран“, изјави Ахмети.
Од 2024 година, од кога замина во опозиција по дводецениско учество во власта, ДУИ спроведува внатрепартиска реорганизација и промовира помлади кадри на раководни позиции, во обид за политичко и генерациско обновување на партијата.