Последните руски предупредувања за можни нови масовни напади врз Киев и повиците странските државјани да ја напуштат украинската престолнина предизвикаа остри реакции од западните партнери на Украина, но не доведоа до повлекување на дипломатските мисии.
По комбинираниот ракетен и беспилотен напад врз Киев на 24 мај, Москва предупреди дека може да следува нов бран удари и ги повика жителите да се држат подалеку од административни и воени објекти. Украинскиот министер за надворешни работи Андриј Сибиха ги оцени пораките како политичка уцена насочена кон заплашување на меѓународната заедница.
Франција, Полска и Германија јавно потврдија дека нивните дипломатски претставништва ќе продолжат да работат во Киев. Амбасадата на Франција соопшти дека руските закани се „неприфатливи“ и претставуваат доказ дека руската агресија се соочува со сериозни ограничувања.
Амбасадорката на Европската Унија во Украина, Катарина Матернова, оцени дека заканите кон дипломатите не се знак на сила, туку на очај.
Политичкиот аналитичар Володимир Фесенко смета дека станува збор за голема психолошка и информативна операција чија главна цел не е Украина, туку западните дипломати и САД.
Според него, Кремљ се обидел да создаде впечаток дека Киев повторно може да стане небезбеден за дипломатско присуство, како во првите денови од руската инвазија во 2022 година.
„Доколку амбасадорите почнеа масовно да заминуваат, Москва ќе го претставеше тоа како доказ дека повторно ја презема иницијативата во војната“, оценува Фесенко.
Тој смета дека операцијата не успеала бидејќи западните земји реагирале координирано, а жителите на Киев не покажале знаци на паника.
Во анализата се наведува дека руските закани се појавуваат во период кога Москва не успева да постигне значајни пробиви на фронтот. Неколку украински аналитичари оценуваат дека Кремљ преку воздушни напади се обидува да компензира за ограничените резултати на бојното поле.
Воениот аналитичар Олександр Коваленко предупредува дека иако нема индикации за нова фаза од војната, Украина треба да очекува продолжување на масовните комбинирани напади со ракети и беспилотни летала.
Според него, Русија се враќа на моделот на редовни големи воздушни напади кои можат да се повторуваат на неделно ниво.
Политичкиот аналитичар Сергиј Фурса смета дека однесувањето на рускиот претседател Владимир Путин ја одразува растечката фрустрација во Кремљ поради недостигот од воени успеси.
„Во авторитарен систем слабоста може да стане политички проблем сама по себе. Кога нема победи на фронтот, остануваат демонстрации на сила преку ракетни напади“, оценува Фурса.
Пратеничката и аналитичарка Викторија Сјумар предупредува дека Русија би можела дополнително да ја зголеми кампањата на напади врз украинските градови во обид да создаде подобра преговарачка позиција.
Во меѓувреме, украинските власти предупредуваат дека Русија сè уште располага со капацитет за нови масовни удари со балистички ракети и дронови, особено во услови кога Украина се соочува со ограничени резерви на ракети-пресретнувачи за системите „Патриот“.
И покрај тоа, доминантната оценка меѓу украинските експерти е дека најновите закани од Москва претставуваат комбинација од психолошки притисок, дипломатско заплашување и обид за прикривање на стагнацијата на фронтот, а не најава за стратешки пресврт во војната.