Поранешниот градоначалник на Општина Карпош, Стевчо Јакимовски, на 2 јули треба да се јави во Казнено-поправната установа „Скопје“ во Шуто Оризари за издржување на едногодишната затворска казна, откако Основниот кривичен суд Скопје му издаде упатен акт.
Од Кривичниот суд информираа дека судија за извршување на санкции денеска го издал упатниот акт, согласно правосилната пресуда во предметот поврзан со изградбата на општинската зграда во Карпош.
Во затворската казна ќе му биде пресметан и периодот што го поминал во куќен притвор од 19 март до 15 август 2019 година. Со тоа, од вкупната едногодишна казна му остануваат за издржување околу седум месеци.
Апелацискиот суд неодамна ја потврди едногодишната затворска казна за делото бесправно градење, поврзано со изградбата на административната зграда на Општина Карпош.
Истовремено, вториот дел од првостепената пресуда, кој се однесува на злоупотреба на службената положба и овластување, за што Јакимовски беше осуден на три години затвор, е укинат од Апелација и предметот е вратен на повторно судење.
Јакимовски по одлуката на Апелацискиот суд изјави дека пресудата е политички мотивирана и дека има за цел да го спречи неговото евентуално политичко враќање. Тој рече дека се смета за „политички осудено лице“ и најави дека правдата ќе ја бара пред Врховниот суд.
Случајот се однесува на изградбата на општинскиот објект во Карпош, за кој првостепениот суд во април минатата година му изрече вкупна казна од три и пол години затвор. По жалбената постапка, правосилна остана само едногодишната казна за бесправно градење.