Лидерите на Европската унија постигнаа напредок во преговорите за новиот долгорочен буџет на блокот, отворија нова фаза во процесот на проширување со Украина и Молдавија и побараа од Европската комисија да подготви дополнителни инструменти за заштита на европската економија од нелојална глобална конкуренција.
Претседателот на Европскиот совет, Антонио Кошта, по дводневниот самит во Брисел изјави дека Унијата направила значителен исчекор во три клучни области – буџетот по 2028 година, економската конкурентност и проширувањето.
„Се доближуваме до нов европски буџет кој ќе одговара на нашите амбиции, обезбедивме насоки за пофер глобална економска конкуренција и го одбележавме историското отворање на првиот преговарачки кластер со Украина“, рече Кошта.
Лидерите се согласија дека до крајот на годинава мора да биде постигнат политички договор за новата повеќегодишна финансиска рамка, со цел средствата да продолжат непречено да се исплаќаат од 1 јануари 2028 година.
Европскиот совет, исто така, ја задолжи Европската комисија да продолжи со разговорите со главните економски партнери на Унијата и паралелно да подготви дополнителни механизми во областа на трговската заштита и индустриската политика.
„Некои глобални економски нерамнотежи станаа неодржливи. Потребен ни е европски одговор заснован на единство и засилен дијалог со нашите главни економски партнери“, изјави Кошта.
На геополитички план, лидерите ја потврдија поддршката за Украина, при што украинскиот претседател Володимир Зеленски учествуваше на дел од состанокот.
Кошта оцени дека отворањето на пристапните преговори со Украина и Молдавија претставува „историски чекор“ и доказ за посветеноста на Унијата кон политиката на проширување.
Тој истакна дека процесот се надоврзува на напредокот на Црна Гора и Албанија, како и на неодамнешниот самит ЕУ–Западен Балкан во Тиват.
Лидерите разговараа и за Блискиот Исток, поздравувајќи го прелиминарниот договор меѓу САД и Иран.
Според Кошта, договорот може да доведе до повторно отворање на Ормускиот Теснец и да создаде услови за долгорочна регионална стабилност.
„Се надеваме дека ова ќе отвори пат кон траен мир, стабилност во регионот и целосно почитување на суверенитетот на Либан“, рече тој.
Европскиот совет ја разгледа и ситуацијата во Газа и на Западниот Брег, при што Кошта ја поздрави намерата на Европската комисија да предложи дополнителни мерки пред следниот состанок на министрите за надворешни работи на ЕУ.
На состанокот беше отворено и прашањето за борбата против трговијата со дрога, при што лидерите се согласија за засилување на соработката меѓу земјите членки и партнерските држави надвор од Унијата.