ВМРО-ДПМНЕ упати нови критики кон лидерот на СДСМ, Венко Филипче, обвинувајќи го дека застапува политики кои, според владејачката партија, се спротивни на државните интереси.
На прес-конференција, портпаролот на ВМРО-ДПМНЕ, Валентин Манасиевски, изјави дека СДСМ продолжува да инсистира на уставните измени како приоритет, и покрај, како што рече, позитивните оценки што земјата ги добива за реформите и економскиот развој.
Манасиевски оцени дека низ годините СДСМ носел одлуки кои, според него, биле на штета на националните интереси, наведувајќи ги промената на името, знамето и Уставот како примери за такви политики.
„Со што е уценет Филипче за да направи ново предавство на Македонија?“, праша Манасиевски, додавајќи дека лидерот на СДСМ наместо да ги брани државните позиции, поддржува политики кои не се во интерес на државата.
Од ВМРО-ДПМНЕ тврдат дека граѓаните веќе ја казниле политиката на СДСМ на претходните избори, поради што партијата денес се наоѓа во опозиција.
СДСМ, пак, на својот програмски конгрес викендов повтори дека уставните измени се неопходен чекор за продолжување на европските интеграции и побара јасен државен план за отворање на кластерите и поглавјата во преговорите со Европската Унија.
Спорот околу уставните измени останува една од главните линии на политичка конфронтација меѓу власта и опозицијата, во период кога земјата се соочува со застој во евроинтеграцискиот процес.