Почетокот на летната сезона и крајот на учебната година предизвикаа големи гужви на граничните премини кон Грција, при што најкритична е состојбата на преминот Евзони, каде туристите пријавуваат повеќечасовни задржувања и километарски колони.
Според сведоштва на патници, уште во раните утрински часови биле формирани долги редици возила, а пред граничниот премин чекале повеќе од 20 автобуси. Сообраќајот кон грчката граница се одвива забавено и покрај тоа што функционираат повеќе контролни пунктови.
Најголем дел од возилата се со српски регистарски таблички, бидејќи многу семејства веднаш по завршувањето на учебната година тргнаа на одмор кон грчките летувалишта.
Во колоните најмногу има семејства со деца, кои наместо брз премин се соочуваат со долги чекања на високи температури. Патниците велат дека колоните се движат бавно и дека е тешко да се процени колку време е потребно за да се стигне до граничната контрола.
Поради метежот на Евзони, дел од туристите се обидуваат да ги користат алтернативните премини, вклучително и Дојран, но и таму е забележан зголемен интензитет на сообраќајот.
Се очекува гужвите дополнително да се зголемат во текот на денот, бидејќи станува збор за првиот голем летен бран на патувања кон грчкото крајбрежје.
Властите и туристичките организации препорачуваат патниците пред поаѓање да ја проверат состојбата на граничните премини и да понесат доволно вода, храна и гориво, особено доколку патуваат со деца или постари лица.