Украина и Молдавија денеска го отворија првиот кластер во пристапните преговори со Европската Унија, додека Црна Гора затвори уште две преговарачки поглавја, во ден што еврокомесарката за проширување Марта Кос го нарече „мегапонеделник за проширувањето“.
Пред почетокот на состанокот на министрите за надворешни работи на ЕУ во Луксембург, Кос изјави дека Украина и Молдавија го прават својот најголем чекор кон членството откако во 2023 година добија зелено светло за почеток на пристапните преговори.
„Конечно ќе можеме да го отвориме првиот кластер за двете земји бидејќи тие испорачаа, а сега е време да испорачаме и ние“, изјави Кос.
Таа додаде дека очекува Украина и Молдавија да ги отворат и останатите пет кластери веќе во јули, доколку продолжат да ги исполнуваат потребните услови.
Паралелно, Црна Гора затвора уште две преговарачки поглавја, со што вкупниот број на привремено затворени поглавја достигнува 16.
Кос оцени дека Подгорица би можела да стигне до завршната фаза на пристапните преговори за време на претстојното ирско претседателство со Советот на ЕУ, доколку го задржи сегашното темпо на реформи.
„Ако Европската комисија, Црна Гора и земјите членки продолжат да работат заедно, преговорите би можеле да бидат завршени за време на ирското претседателство или до неговото завршување“, рече таа.
Според Кос, проширувањето повторно станува една од клучните геополитички алатки на Европската Унија.
„Во последните 16 или 17 месеци постигнавме повеќе отколку во претходните 15 години“, изјави еврокомесарката.
Во меѓувреме, Северна Македонија останува надвор од новиот бран напредок во проширувањето, без отворање на кластерите поради нерешените услови поврзани со уставните измени и спорот со Бугарија.
Високата претставничка на ЕУ за надворешна политика Каја Калас изјави дека проширувањето останува стратешки приоритет на Унијата, нагласувајќи дека ЕУ разгледува дополнителна поддршка за Ерменија, која според неа се соочува со зголемен притисок од Русија.