Дали младите генерации го губат интересот за книгите поради зависноста од мобилните телефони и социјалните мрежи? Прашањето повторно се најде во фокусот на јавната дебата во Велика Британија по објавувањето на листата на 100 најдобри романи на сите времиња, подготвена од „Гардијан“.
Уредниците на рубриката за книги на британскиот весник одговараа на прашања на читателите, при што една од најчестите теми беше влијанието на паметните телефони врз навиките за читање.
„Ако сте на телефонот и бесконечно скролате, тогаш не читате книга, не се дружите, не создавате нешто и не одите на прошетка“, изјави Дејвид Шариатмадари, уредник за публицистика во „Гардијан“.
Според него, кратките видеосодржини и постојаните дигитални дразби ја намалуваат способноста за долготрајна концентрација, што претставува сериозен предизвик за читањето литература.
Дебатата доаѓа во време кога британските власти воведуваат построги ограничувања за користење мобилни телефони во училиштата, а се разгледуваат и мерки за ограничување на пристапот на малолетници до социјалните мрежи.
Истовремено, експертите гледаат и позитивни страни во дигиталната ера. Аудиокнигите и платформите како BookTok придонесуваат за создавање нови читателски заедници и повторно ја будат љубовта кон литературата кај помладите генерации.
На прашањето дали слушањето аудиокнига може да се смета за „читање“, уредниците одговорија потврдно, иако признаваат дека не сите книжевни дела еднакво добро функционираат во аудио формат.
Во дискусијата се отвори и прашањето дали класичните дела ќе останат релевантни во иднина. Според учесниците, книжевниот канон постојано се менува, а дел од авторите кои пред две децении биле неизбежни на вакви листи денес веќе не се меѓу највлијателните.
Листата на „Гардијан“ покажа дека книжевните класици и натаму доминираат, но истовремено отвори простор за современи автори како Чимаманда Нгози Адичи, Елена Феранте и Хан Канг, чии дела се сметаат за потенцијални класици на 21 век.
За многу читатели, пак, најголемо влијание и натаму имаат книгите прочитани во младоста – период кога литературата најсилно ги обликува ставовите, вредностите и погледот кон светот.
И покрај стравувањата дека дигиталната ера ќе ја потисне книгата, дебатата околу листата покажа дека интересот за литературата останува силен, а прашањето што претставува „голем роман“ продолжува да предизвикува подеднакво силни реакции како и самите книги.