Северна Кореја во неделата соопшти дека прашањето за нејзината денуклеаризација е „неповратно завршено“, осудувајќи ги неодамнешните разговори меѓу САД и Јужна Кореја за зајакнување на нуклеарното одвраќање против Пјонгјанг.
„Бесмислената реторика на САД и нивните вазалски сили против ДНРК и соработката во создавање нуклеарна закана никогаш нема да влијаат врз неповратната позиција на ДНРК како држава со нуклеарно оружје“, изјави портпарол на севернокорејското Министерство за надворешни работи во соопштение објавено од државната агенција КЦНА.
Во соопштението се наведува дека „денуклеаризацијата е неповратно финализирано прашање“.
Изјавата следува откако американски и јужнокорејски претставници минатата недела во Сеул разговараа за зајакнување на нуклеарното одвраќање и подготвеноста за одговор на растечката програма за вооружување на Северна Кореја во рамки на Нуклеарната консултативна група (NCG).
Пјонгјанг во последните години значително ги засили тестирањата на балистички и крстосувачки ракети и постојано тврди дека неговиот нуклеарен арсенал е неопходен за националната безбедност.
САД, Јужна Кореја и нивните сојузници продолжуваат да бараат целосна денуклеаризација на Северна Кореја, но властите во Пјонгјанг сè почесто сигнализираат дека таквата можност повеќе не е предмет на преговори.