Светската здравствена организација прогласи меѓународна здравствена вонредна состојба поради новата епидемија на ебола во Демократска Република Конго и Уганда.
Африканскиот центар за контрола и превенција на болести потврди дека епидемијата е регистрирана во провинцијата Итури во Конго, каде до минатиот викенд биле пријавени 336 сомнителни случаи и 88 смртни случаи.
Министерот за здравство на Конго, Самуел Роже Камба, изјави дека бројот на починати пораснал на 134 лица.
Здравствените власти соопштија дека епидемијата е предизвикана од ретката варијанта „Бундибугио“, за која во моментов нема одобрени лекови или вакцини.
Епидемијата се шири во регион погоден од вооружени конфликти и хуманитарна криза, што дополнително ја отежнува борбата против вирусот.
Епидемиологот Лина Мозес од Универзитетот „Тулејн“, која работела на следење контакти за време на епидемијата во Западна Африка во 2014 година, оцени дека станува збор за „исклучително комплициран контекст за управување“.
Вирусот ебола се пренесува преку контакт со телесни течности како крв, повраќање и семена течност, како и преку контаминирани предмети и површини.
Симптомите вклучуваат треска, повраќање, дијареја, болки во мускулите, а во потешки случаи и внатрешно и надворешно крварење.
Првиот случај на ебола беше откриен во 1976 година во близина на реката Ебола, на територијата на денешно Конго.
СЗО соопшти дека сегашната епидемија не ги исполнува критериумите за пандемија како ковид-19 и засега не препорачува затворање на меѓународните граници.
Организации кои учествуваат во одговорот на кризата се УНИЦЕФ, Меѓународната организација за миграција, „Лекари без граници“, Светската програма за храна и Црвениот крст.