Грчките аеродроми повторно се соочуваат со сериозни доцнења во екот на летната туристичка сезона, поради недостиг на контролори на летање, застарена авијациска инфраструктура и ограничен капацитет на воздушниот простор, објави грчкиот весник „Катимерини“.
Илјадници патници се погодени од продолжени чекања и одложувања на летови, откако зголемениот број туристи повторно го стави под притисок националниот авијациски систем. По краткото олеснување во зимскиот период, кога бројот на летови беше помал, проблемите повторно се интензивираа во мај.
Во основата на кризата се ограничените капацитети на системите за контрола на летање со кои управува грчката Управа за цивилно воздухопловство, како и недоволниот број на контролори. Дополнителни проблеми предизвикуваат честите дефекти на навигациската опрема, дел од која потекнува од 1990-тите години.
Неодамнешен дефект на радарскиот систем за приоди на аеродромот во Атина привремено го намали капацитетот за слетување од 28 на 24 авиони на час, што доведе до дополнителни нарушувања во распоредот на летовите на најголемиот грчки аеродром.
Според најновите податоци на Европската организација за безбедност на воздушната навигација (Eurocontrol), Грција во периодот од 15 до 21 јуни учествувала со 12 проценти од вкупните доцнења во европската авијациска мрежа, со што се рангирала како четврто најоптоварено подрачје во Европа.
Во истиот период, земјата била меѓу десетте најфреквентни авијациски мрежи на континентот, со просек од 2.453 летови дневно. Најголем притисок трпи аеродромот во Атина поради концентрацијата на патнички и авионски сообраќај.
Грчките власти дополнително анализираат можности за подобра координација на термините за полетување и слетување, бидејќи голем дел од сообраќајниот метеж е концентриран во утринските часови, кога побарувачката редовно го надминува расположливиот капацитет.
Дополнителни доцнења создава и новиот систем за влез и излез на Европската Унија (Entry/Exit System), кој бара собирање биометриски податоци од патниците кои не се државјани на ЕУ. Просечното време за гранична контрола е зголемено на околу 90 секунди по патник, во споредба со претходните околу 20 секунди.
Со оглед на тоа што летната сезона допрва го достигнува својот врв, експертите предупредуваат дека притисокот врз грчката авијациска инфраструктура може дополнително да се зголеми во јули и август.