Во раните утрински часови денеска ненадејно почина Арсим Зеколи, поранешен дипломат, политички аналитичар и амбасадор на Северна Македонија во седиштето на ОСБЕ во Виена.
Веста за неговата смрт ја соопштија негови блиски и пријатели преку објава на социјалните мрежи.
„Со длабока болка и голема тага, ве известуваме дека денес, во раните утрински часови, неочекувано почина Арсим Зеколи“, стои во објавата.
Според информацијата од семејството, погребната церемонија ќе се одржи денеска во 18 часот на гробиштата во населбата Зеколи во селото Блаце.
Арсим Зеколи беше долгогодишен дипломат и познавач на меѓународните односи. Во текот на својата кариера работеше во повеќе меѓународни организации и институции, а беше и постојан претставник на Македонија при Обединетите нации и меѓународните организации во Виена.
Во јавноста беше препознатлив и како политички аналитичар и коментатор на регионалните и меѓународните случувања.