Најмалку 19 лица загинаа, а 134 се повредени во силен земјотрес со магнитуда од 7,8 степени што го погоди јужниот дел на Филипините, соопштија тамошните власти.
Епицентарот бил регистриран во морето во близина на градот Генерал Сантос на островот Минданао, додека потресот се случил на длабочина од 10 километри, според Филипинскиот институт за вулканологија и сеизмологија.
Властите соопштија дека седум лица се водат како исчезнати, а бројот на жртви и повредени може дополнително да се зголеми додека продолжуваат спасувачките операции.
По земјотресот беа издадени предупредувања за цунами во Филипините, Индонезија и Јапонија. Подоцна беа регистрирани бранови високи од неколку сантиметри до 1,4 метри, по што поголемиот дел од предупредувањата беа укинати.
Фотографии и видеоснимки од погодените подрачја покажуваат урнати згради и сериозно оштетена инфраструктура. Меѓу објектите што се урнаа е и ресторан од познат синџир за брза храна во градот Генерал Сантос.
Филипинскиот претседател Фердинанд Маркос Јуниор соопшти дека им наредил на сите надлежни институции веднаш да реагираат и ги повика граѓаните во ризичните области да се преместат на повисоки места.
Земјотресот се случи на почетокот на новата учебна година, поради што наставата во погодените региони е привремено прекината.
Филипините се наоѓаат на Пацифичкиот огнен прстен, една од сеизмички најактивните области во светот, каде што силни земјотреси и вулкански ерупции се честа појава. Според научниците, потресот бил поврзан со движење на тектонските плочи долж Котабато ровот, една од најактивните раседни структури во регионот.