Бугарското Министерство за надворешни работи соопшти дека не испратило дипломатска нота ниту друга официјална кореспонденција поврзана со посетата на членови од семејството на македонскиот премиер Христијан Мицкоски на Бугарија.
Реакцијата следува по изјавата на министерот за надворешни работи и надворешна трговија Тимчо Муцунски, кој побара Софија да се извини и да објасни како во јавноста се појавиле информации за патувањето на семејството на премиерот во Пампорово.
Од бугарското МНР наведуваат дека информациите што во последните денови се појавија во јавноста се однесуваат на вербална нота од 6 јануари 2026 година и на настани што, според нив, одамна завршиле.
„Во моментов оваа информација не може да се смета за основа за заклучоци дека постои непосредна опасност за безбедноста на граѓани на Бугарија или на друга држава“, соопшти Министерството.
Оттаму додаваат дека придаваат исклучително значење на заштитата на дипломатската кореспонденција и дека строго ги почитуваат меѓународните правила и практики во оваа област.
Македонската страна претходно побара извинување и објаснување, тврдејќи дека во јавноста била објавена доверлива дипломатска комуникација поврзана со безбедносните аспекти на приватната посета на семејството на премиерот.