Забраната за уништување непродадена облека, обувки и модни додатоци стапи во сила низ Европската унија, како дел од новите мерки за намалување на отпадот и поттикнување на одржливо производство.
Според новата Регулатива за еколошки дизајн на одржливи производи, големите компании со повеќе од 250 вработени и годишен нето-промет над 50 милиони евра повеќе нема да смеат да уништуваат непродадени залихи на облека, обувки и модни додатоци.
Наместо тоа, тие ќе мора да ги продаваат по намалени цени, да ги пласираат на други пазари или да ги донираат на хуманитарни организации.
Уништување ќе биде дозволено само ако производите се небезбедни, оштетени, фалсификувани или ако добротворните организации одбијат да ги преземат.
Компаниите ќе имаат обврска секоја година да објавуваат извештаи за уништените производи и да ја чуваат документацијата најмалку пет години. Од 2030 година правилата ќе важат и за средните компании.
Борба против отпадот од брзата мода
Европската агенција за животна средина проценува дека секоја година се уништуваат меѓу четири и девет проценти од непродадените текстилни производи во ЕУ.
Проблемот дополнително се зголемува поради интернет-трговијата, бидејќи секое петто парче облека купено онлајн се враќа кај продавачот и често не се продава повторно.
ЕУ очекува новите правила да придонесат за намалување на емисиите на стакленички гасови, како и за поефикасно користење на суровините, водата и енергијата во текстилната индустрија.
Трговците предупредуваат на предизвици
Германската трговска федерација оцени дека потрошувачите ќе имаат корист преку повеќе попусти, аутлет-продажби и понуда на половна облека.
Сепак, федерацијата предупреди дека дел од непродадените производи нема лесно да можат да се препродадат или донираат поради оштетена амбалажа, високи логистички трошоци, слаб интерес или ниска вредност на производите.