Канада му додели на германскиот производител „Тисенкруп Марин Системс“ (TKMS) договор за изградба на до 12 подморници, што премиерот Марк Карни го нарече најголемата воена набавка во историјата на земјата.
Договорот, чија вредност според германската новинска агенција ДПА се проценува на околу 20 милијарди евра, беше објавен непосредно пред почетокот на самитот на НАТО во Анкара, каде зголемувањето на одбранбените трошоци е една од главните теми.
TKMS ја победи јужнокорејската компанија „Ханва Оушн“ во изборот за новата канадска флота. Подморниците од моделот 212CD ќе се произведуваат во бродоградилиштата во Кил и Визмар, каде се очекува да бидат отворени до 1.500 нови работни места.
Германскиот канцелар Фридрих Мерц оцени дека договорот испраќа силен сигнал за европското и трансатлантското партнерство и му се заблагодари на Карни за довербата.
Министерот за одбрана Борис Писториус изјави дека новата флота ќе стане клучен столб на стратегијата на НАТО во Северниот Атлантик и Арктикот.
„Заедно ќе ја изградиме најголемата и најсовремената флота на конвенционални подморници во светот“, рече Писториус, додавајќи дека Германија, Норвешка и Канада ќе располагаат со вкупно 24 подморници кои ќе споделуваат разузнавачки информации и ќе ја зајакнат одбраната на северниот дел од Алијансата.
Канадската влада соопшти дека првите подморници треба да влезат во употреба до 2035 година.
Оваа набавка е дел од пошироките напори на Отава за продлабочување на одбранбената соработка со Европа, во услови на растечки безбедносни предизвици и засилена улога на НАТО во Арктикот и Северниот Атлантик.