Советот на Европската Унија во петокот го одобри новиот План за закрепнување и отпорност (RRP) на Унгарија, отворајќи пат за исплата на околу 10 милијарди евра европски средства.
Пакетот се состои од околу 6,5 милијарди евра неповратни грантови и 3,5 милијарди евра заеми, во рамки на европскиот инструмент „NextGenerationEU“, создаден за поддршка на економското закрепнување по пандемијата и забрзување на зелената и дигиталната транзиција.
Одлуката следува по поднесувањето на нов план од страна на Будимпешта, откако претходниот не можеше целосно да се реализира поради растот на енергетските цени, променетите геополитички околности, проблемите во спроведувањето и временските ограничувања.
Новиот план содржи мерки за зајакнување на борбата против корупцијата, поголема транспарентност во управувањето со јавните средства и јавните набавки, подобро вклучување на засегнатите страни во законодавниот процес, како и реформи за јакнење на независноста на судството и владеењето на правото.
Советот нагласи дека сите исплати ќе бидат условени со исполнување на однапред договорените цели и реформски чекори. Европската комисија ќе ги одобрува средствата само по потврда дека договорените реформи и инвестиции се реализирани.
Покрај Унгарија, Советот усвои и ограничени измени на националните планови за закрепнување на Кипар, Финска, Германија, Летонија, Литванија, Луксембург, Холандија и Словенија, оценувајќи дека тие не ја нарушуваат ефикасноста и кохерентноста на нивните програми.
Инструментот за закрепнување и отпорност претставува најголемата финансиска програма на Европската Унија за справување со последиците од пандемијата на ковид-19. Досега преку него се исплатени повеќе од 429 милијарди евра, а земјите членки треба да ги завршат сите договорени реформи и инвестиции до крајот на август 2026 година.