Судијката Даниела Димовска е избрана за нова претседателка на Основниот кривичен суд Скопје. Одлуката ја донесе Судскиот совет, по завршувањето на постапката за избор на претседател на судот.
На јавниот оглас за функцијата се пријавија двајца кандидати: Даниела Димовска, судијка и досегашна вршителка на должноста претседател на Основниот кривичен суд Скопје, и Ивица Стефановски, исто така судија во истиот суд.
Судскиот совет ја избра Димовска со 11 гласа „за“, а таа доби и четири гласа „за“ според Бадентеровото мнозинство.
Одлуката ја соопшти претседателот на Судскиот совет, Александар Камбовски.
„Констатирам дека Судскиот совет донесе одлука со која Даниела Димовска се избира за претседателка на Основниот кривичен суд – Скопје“, изјави Камбовски.
Претседателот на Комисијата за избор, Ивица Николовски, информираше дека двете кандидатури биле уредни и дека кандидатите ги поминале сите предвидени фази од постапката, вклучувајќи ги тестирањата и интервјуата.
Димовска ја извршуваше функцијата вршител на должност претседател на судот во изминатата една година. Претходно беше судијка во Одделот за организиран криминал и корупција при Основниот кривичен суд Скопје, каде што постапувала по предмети поврзани со организиран криминал и висока корупција.