Демократската унија за интеграција (ДУИ) ја обвини Владата дека на Самитот на НАТО во Анкара испратила државна делегација без ниту еден претставник Албанец, оценувајќи дека таквиот состав не го одразува мултиетничкиот карактер на Северна Македонија.
Во соопштението, ДУИ наведе дека државните делегации треба да ја одразуваат еднаквоста и принципите на Охридскиот рамковен договор.
„Претставување без Албанци не е претставување на државата. Северна Македонија е мултиетничка држава и членка на НАТО благодарение на политичка архитектура изградена врз еднаквост, застапеност и Охридскиот договор“, соопшти партијата.
Од коалицијата ВЛЕН ги отфрлија критиките.
Пратеникот Беким Ќоку изјави дека Албанците се дел од повеќето државни делегации, но рече дека нема информации за причините поради кои во конкретниот случај нема албански претставник.
„Во најголем дел од делегациите каде што се смета дека треба да има претставник од ВЛЕН, имало и ќе има. ВЛЕН е дел од мнозинството процеси во кои учествуваат државните делегации“, изјави Ќоку.
Северна Македонија на самитот во Анкара е претставена од претседателката Гордана Сиљановска-Давкова, министерот за одбрана Владо Мисајловски, министерот за надворешни работи и надворешна трговија Тимчо Муцунски и началникот на Генералштабот на Армијата, генерал-мајор Сашко Лафчиски.