Американското Министерство за војна ја објави ажурираната листа на странски институции кои, според Вашингтон, се вклучени во активности што претставуваат ризик за националната безбедност преку неовластен трансфер на технологии.
Листата, изготвена согласно член 1286 од Законот за овластување на националната одбрана (NDAA), опфаќа 130 академски и истражувачки институции од Кина, Русија и Иран.
Според Министерството, овие институции се идентификувани како субјекти кај кои постои зголемен ризик американски истражувања финансирани со федерални средства да бидат злоупотребени или искористени од странски влади.
„Министерството ја зајакнува својата посветеност за заштита на истражувањата финансирани од американските даночни обврзници и за зачувување на интегритетот на американската научна заедница“, изјави потсекретарот за истражување и инженерство Емил Мајкл.
Министерството ги повика американските универзитети, истражувачките центри и приватните компании да бидат особено внимателни при воспоставување соработка, финансирање или размена на податоци со институциите што се наоѓаат на листата.
Забрана за федерално финансирање
Од фискалната 2026 година, американските федерални институции нема да смеат да доделуваат средства за фундаментални истражувања што вклучуваат соработка со институција која се наоѓа на листата.
Забраната се однесува на грантови, договори и други форми на федерална финансиска поддршка за високообразовни институции. Таа опфаќа и користење опрема од наведените субјекти, како и истражувачка соработка со нивните вработени.
Истражувачите се обврзани да ги пријават сите врски со институциите на листата, како и евентуално учество во странски програми за привлекување научен кадар. Непријавувањето на таквите активности, според американските власти, може да претставува прекршување на федералниот закон.
Министерството најави дека листата ќе се ажурира најмалку еднаш годишно, или почесто доколку нови разузнавачки информации укажат на дополнителни безбедносни ризици.