Арбен Фетаи соопшти дека Владата на Северна Македонија го именувала за специјален пратеник за Европската унија со седиште во Брисел, со задача да придонесе за унапредување на евроинтегративниот процес на земјата.
Во објава на Фејсбук, Фетаи оцени дека назначувањето претставува „голема чест“, но и „уште поголема одговорност“.
„Задачата што ми е доверена е да се ангажирам за унапредување на процесот на европската интеграција на нашата држава, преку зајакнување на политичката поддршка во институциите и земјите членки на Европската унија, придонес во надминувањето на политичките и дипломатските предизвици и посилно присуство на гласот на Северна Македонија во Брисел и европските престолнини“, напиша Фетаи.
Тој наведе дека на новата функција доаѓа по долгогодишна кариера во Брисел и искуство стекнато во Владата, додавајќи дека останува посветен на европската перспектива на земјата.
„Оваа должност ја преземам со целосно уверување дека иднината на Северна Македонија е во Европската унија“, порача Фетаи.
Тој му се заблагодари на премиерот и на Владата за укажаната доверба.
„Патот кон Брисел продолжува – со решителност, партнерство и целосна верба во нашата европска иднина“, напиша Фетаи.