Северна Македонија и Германија ја потврдија посветеноста на продлабочување на одбранбената соработка и зајакнување на партнерството во НАТО за време на посетата на началникот на германските вооружени сили, генерал Карстен Бројер.
На средбата со претседателката Гордана Сиљановска-Давкова беше оценето дека македонско-германската соработка во рамките на Алијансата придонесува за регионалната стабилност и безбедност.
Според кабинетот на претседателката, Сиљановска-Давкова изјавила дека партнерството со Германија придонесува за изградба на отпорен, модерен и интероперабилен одбранбен систем и за натамошно јакнење на капацитетите на Армијата.
Германскиот генерал ја оцени македонската Армија како „кредибилен и доверлив сојузник“, нагласувајќи дека нејзините припадници рамноправно учествуваат во заедничките мисии, вежби и активности на НАТО.
На средбата било оценето и дека постои простор за натамошно продлабочување на економската, образовната и културната соработка меѓу двете земји, додека Сиљановска-Давкова ја истакнала улогата на македонската дијаспора во Германија како мост во билатералните односи и ја поздравила германската поддршка за реформите и инфраструктурните проекти во земјата.
Бројер се сретна и со премиерот Христијан Мицкоски и министерот за одбрана Владо Мисајловски, при што разговараа за натамошно унапредување на билатералната одбранбена соработка, заедничките активности во НАТО и актуелните безбедносни предизвици во Европа.
Мицкоски соопшти дека двете страни ја потврдиле определбата за размена на искуства, развој на воените капацитети и продлабочување на партнерството со цел зајакнување на регионалната и евроатлантската безбедност.
На заедничката прес-конференција со началникот на Генералштабот на Армијата, генерал-мајор Сашко Лафчиски, Бројер порача дека Северна Македонија има значајна улога во зачувувањето на стабилноста на Западен Балкан и дека неговата посета има цел дополнително да ја унапреди долгогодишната соработка меѓу двете армии.